Paano nga ba?

ni Ogot Sumulong

Paano nga ba

hinihinang ang salitang

bantad sa 

   pagbaha ng batasang pangungurakot

   pagkitil ng labingsiyam na kinabukasan

   parada ng buwayang buwang at hibang na halimaw

   pagpinta ng huwad na katotohanan

   pangngungupit sa 695 butil ng buto’ t balat na araw

   pagsangla ng kalikasan kapalit ng kalansing at tingga

Nalulula ang utak sa 

   espasyo ng dismaya at pag-asa

   lilim ng bubong at bukas

   tanghalan ng ngayon at panghihinawa

Napipipi sa paos na pangarap

Natutulala sa binalasang buhay

Nalulublob sa putikan ng alinlangan

Naninimbang sa lutong-makaw na balita

Nagtitinikling sa dagok at sipa

   ng kabisera ng kasaysayan

   at laylayan ng lipunan

Pero may 

   bulong ang tinubuang lumot

   alingawngaw ang ibayong alamat

kumakatok sa

   lungga ng pananahimik

   pusong pinanday ng pagsubok at tiyaga

hinuhuni ang hikbi at galit

   ng higit 7,100 pulso

kipkip ang kwento ng 

   333 rosaryo

   50 hamburgers 

   3 bote ng sake

at ang kundiman ng 

   magsasaka at lupa

   repormismo at rebolusyon

   batas militar at tokhang

   pandemya at baha

   layag-dayo at wasak-pamilya   

tagni-tagni ang tugma’ t sukat 

   ng paglinang ng tanong ng panahon

hinahanap ang himig pauwi sa pagkakakilanlan

hinahawi ang hiwaga sa himala ng pambubulag

hinuhubog ang hamon ng dilat na kamalayan

at dahan-dahan 

unti-unting titining 

tataginting ang himig ng tulang 

tutugis sa tutoo at tunay

Paano nga bang hinihinang

ang kaluluwa ng kataga

Tara nang tarukin 

Chicago, 27 Abril 2026